CONTRIBUTED PHOTO: Ang ilan sa mga Taiwan-made food products naka-ban ngayon sa ating bansa dahil sa ang mga ito ay nagtataglay ng maleic acid at synthetic resins na mga sangkap sa paggawa ng automobile parts at plastics. (COURTESY: Food and Drugs Administration)

MANILA, Philippines — Ipinagbabawal ng Food and Drug Administration (FDA) ang pagpasok sa bansa ng 15 produkto mula sa Taiwan.

Narito ang listahan ng mga ipinagbabawal na Taiwan food products:

1. Tea World Starch Ball
2. Top 1 Tapioca Pearls
3. Sun Right Indica Rice Powder
4. Redman Black Tapioca Pearl
5. Hong Tapioca Starch
6. Long Kow Rice Noodle with Thick Soup
7. Long Kow Vegetarian Instant Rice Noodle
8. Full Free Yam Rapioca Ball
9. Full Free Green Tea Tapioca Ball
10. T & M Resources Corp Tapioca Pearls
11. Sun Chi Noodles
12. Ding Long Tapioca Pearls
13. Starch Ball
14. Pure Tea Tapioca Pearls (black & white)
15. Unbranded Starch Ball

Batay sa ipinalabas na advisory ng FDA, nagtataglay umano ang mga ito ng maleic acid na ginagamit sa pag-manufacture ng automobile parts at synthetic resins na sangkap umano sa paggawa ng plastic.

Ayon sa FDA, nakasasama sa kalusugan ang maleic acid lalo na sa kidney o bato ng tao.

Hindi rin umano rehistrado sa FDA para ibenta sa bansa ang mga nabanggit na produkto.

Sa ngayon ay patuloy ang ginagawang monitoring ng ahensya sa Taiwan food products na narito sa bansa.

Pinayuhan ang mga mamimili na maging mapanuri sa mga bibilhing produkto lalo na kung ito ay imported.

Upang makatiyak na ang bibilhin ay rehistrado sa FDA, maaaring bisitahin ang website na www.http://fda.gov.ph.

At para sa mga katanungan, maaari ring mag-email sa info@fda.gov.ph.(Jerico Albano & Ruth Navales, UNTV News)

Ang ilan sa mga toxic na lalurang ibinebenta sa paligid ng mga pampublikong paraalan ayon sa Ecowaste Coalition. (UNTV News)

MANILA, Philippines — Muling nanawagan ang Ecowaste Coalition sa publiko na huwag bumili ng mga laruan na nagtataglay ng nakalalasong kemikal na ibinibenta sa labas ng ilang mga pampublikong paaralan.

Sa pag-iinspeksyon ng ilang environmental at health watchdogs, napag-alamang positibo sa nakalalasong kemikal ang ilang laruan na ipinagbibili mula sa 38 paaralan partikular sa lungsod ng Caloocan, Makati, Malabon, Manila, Pasay, Quezon at Taguig.

Ayon sa Ecowaste Coalition, karamihan sa mga laruan ay positibo sa kemikal na lead, mercury, antimony at iba pang nakalalasong kemikal na mapanganib sa kalusugan lalo na sa mga bata.

Pangunahing sinisira ng lead ang utak at nagpapahina sa intelligence quotient ng isang tao;  habang ang mercury naman ay maaring magdulot ng neurological at behavioral disorder.

Nanawagan naman ang Ecowaste sa mga tindera na itigil na ang pagtitinda ng mga ganitong uri ng mga laruan na nakasasama sa kalusugan ng mga bata. (Cecille Bodena, UNTV News)

Ang 3-week old na sanggol na si Ashlyn Julian na may aneurysm na nasagip sa pamamagitan ng “superglue”. (Screenshot of a Reuters video)

Kansas, USA – Isang sanggol na hindi mapigilan ang pagdurugo sa kanyang utak ang nailigtas ng mga doktor sa Kansas, USA matapos operahan gamit ang superglue.

Si baby Ashlyn Julian mula sa Olathe, Kansas, USA ay na-diagnose na may sakit na aneurysm o ang abnormal na paglaki o paglobo sa isang bahagi ng ugat.

Ayon sa mga doktor, bihira sa mga sanggol ang ganitong sakit at sa kaso ni baby Ashylyn, nagdudulot ito ng pagdurugo sa dalawang bahagi ng kanyang utak.

Dahil delikado at walang infant size na gamit sa operasyon ang brain surgeons, nagpasya silang gumawa ng kakaibang hakbang upang sagipin ang buhay ng sanggol.

Gamit ang mga instrumentong kasinlaki lamang ng pencil lead at kasing-nipis ng isang hibla ng buhok, nagawa ng mga duktor na pasukin ang utak ng sanggol at lagyan ng superglue ang depektibong ugat nito.

Tumagal ang operasyon ng halos 45-minuto.

Ayon kay Dr. Koji Ebersole, Endovascular Neurosurgeon ni baby Ashylyn, posibleng tumagal pa ng ilang araw bago tuluyang maialis ang fluid sa utak ng sanggol para siya’y tuluyang gumaling. (UNTV News)

FILE PHOTO: Doctor Penny Allen (R) examines Dianne Ashworth, who is fitted with a prototype bionic eye, in Melbourne August 20, 2012. A bionic eye has given the Australian woman partial sight and researchers say it is an important step towards eventually helping visually impaired people get around independently.
Credit: Reuters/David Mirabella/Bionic Vision Australia/Handout

MELBOURNE, Australia – Nasa 45,000 bulag ang tutulungang maibalik ang paningin sa Melbourne, Australia.

Ang Monash Vision System na nilikha ng 60 tao sa Monash University ay tutulong sa mga bulag na makakita sa pamamagitan ng brain implant na nakakonekta sa camera.

Ang nasabing camera naman ang kukuha at magdadala ng imahe sa tulong ng digital processor sa isang chip na ilalagay sa ilalim ng bungo, sa likod na bahagi ng ulo.

Ang naturang teknolohiya ang inaasahang magbibigay ng pag-asa para makakita ang isang bulag ng serye ng mga tuldok at kulay.

Nakatakda namang maglabas ng prototype ang Monash researchers sa susunod na taon at kung ito ay maging matagumpay, inaasahan na magagamit na ito sa loob ng sampung taon. (UNTV News)

A tourist wearing a face mask passes the hazy skyline of the Marina Bay Sands casino and resort in Singapore on June 18, 2013. (Photo: Reuters / Edgar Su)

SINGAPORE — Umabot na sa 379 ang Pollutant Standard Index (PSI) reading sa bansang Singapore dulot ng maitim na usok bunga ng nasusunog na kabundukan sa Sumatra, Indonesia.

Bunsod nito, nangangamba ang mga residente sa kanilang kalusugan lalo na ang mga bata at senior citizen na mahina ang baga at puso.

Nauna nang nagpaalaala ang gobyerno sa mga residente na magsuot ng masks kung lalabas sa lansangan o di kaya’y manatili na lang sa loob ng bahay upang makaiwas sa polusyon.

Ayon sa village head ng Teluk Meranti Riau Province, matagal nang problema ng pamahalaan ang mga ganitong iligal na gawain di lamang ng mga magsasaka kundi ng malalaking agricultural corporations na gustong magtayo ng commercial establishment sa lugar.

Sa ngayon ay nakikipagugnayan na ang Singapore government sa pamahalaan ng Indonesia upang   masolusyunan ang haze pollution na hindi lamang nakaaapekto sa kalusugan kundi maging sa air traffic control sa paligid ng Singapore. (Marje Navarro & Ruth Navales, UNTV News)

Ang recording ng ASOP Grand Finals entry na “You’re My God” ng composer na si Nessey Armillo sa interpretasyon ni Ms. Gian Gloria at sa pamamahala ng produksyon ni OPM Hitmaker Mon Del Rosario sa BMPI Recording Studio. (UNTV News)

MANILA, Philippines — Sinimulan na ang recording ng ikalawang commemorative album ng A Song of Praise (ASOP) Music Festival sa BMPI recording studio sa La Verdad Christian College sa EDSA, Caloocan City.

Nauna ng binigyang buhay ng theater artist na si Gian Gloria ang isa sa awiting mapapaloob dito na “You’re My God” ni Nessey Armillo.

“Ang ganda nung naging result kasi nagpa-practice si Gian kung ano yung mas magandang ilalabas ng kanyang pag-iinterpret. Si Miss Gian talaga yung pagkaka-interpret nya dun sa song ko yun yung ramdam na ramdam ko, yun talaga yung gusto kong maging outcome ng kanta,” ani Nessey.

“Grabe! Alam mo talagang speechless pa rin ako until now na naging part ako ng grand finals, tsaka kanina sa recording hindi ako makapaniwala na nakatrabaho ko si Doc Mon Del Rosario, sobrang it’s really an honor for me talaga to work with him, to be able to record a song here sa studio na’to ang ganda-ganda,” masayang pahayag ni Gian.

Maging ang kasalukuyang record producer nito na sya ring manager ng BMPI Recording Studio na si Mon Del Rosario ay humanga sa kinalabasan ng paunang awit sa naturang album.

Kwento ni Mon, excited na siya sa kalabasan ng bagong album ng ASOP dahil sa dami ng magagandang awitin.

“Exciting siguro itong susunod na mga araw, una kanina nagdub ng vocal tracks si Gian Gloria, ang galing. Kung itong kanta na’to ay representative ng darating ng mga vocal dubbing session, sabihin ko siguro umuusok, lilitaw talaga yung ganda.” (ADJES CARREON / UNTV News)

Electronic cigarette or e-cigarette. FILE PHOTO. (REUTERS)

MANILA, Philippines – Nababahala na ang World Health Organization (WHO) dahil dalawang malaking kumpanya na ng sigarilyo ang nag-invest sa electronic cigarette (e-cigarette).

Sa ginawang pag-aaral ng WHO, lumalabas na walang konkretong ebidensyang magpapatunay na ligtas ngang gamitin ang e-cigarette.

Wala ding pruweba na nakatutulong ito upang ang isang cigarette smoker ay mahinto sa paninigarilyo.

Ayon kay Susan Mercado ng WHO, ang e-cigarrete ay nagtataglay ng purong nikotina na maaaring maging sanhi ng atake sa puso at stroke.

“Specially in young kids or older persons, you could trigger heart attack or even stroke if you don’t know how much nicotine you inhaling.”

Bunsod nito, pabor ang WHO na i-regulate ng Department of Health (DOH) ang e- cigarette.

Sa ibang bansa gaya ng Singapore, Hong Kong, Australia at United Kingdom ay may regulasyon nang ipinatutupad kaugnay sa e-cigarette.

Ngunit sa ibang bansa, imbes na matigil ang paninigarilyo ng isang tao ay lalo pa umanong nalulong dito.

“What we’ve seen in other country they start in e-cigarette and they end up in smoking a regular cigarettes,” pahayag pa ni Mercado.

Ayon kay DOH Secretary Enrique Ona, pinaplano na ng ahensy na iregulate ito at patawan na rin ng sin tax tulad ng regular na sigarilyo.

Ayon kay Ona, batay sa inisyal na pagaaral, ang e-cigarette ay nakasasama lalo na sa nalalanghap na kemikal mula dito.

Ayaw lamang aniyang ibunyag ng ilang manufacturer sa China ang iba pang content ng e-cigarette.

“Baka ito ay palusot lamang, and at the same time we would like thourugh solid ground with the side with to strongly say na hindi talaga ito pwede.”

Sa ngayon ay ikinukonsidera na ng DOH na isang regular na sigarilyo ang e-cigarette.

Samantala, pinarangalan ng WHO Western Pacific Regional Office ang pamahalaang Aquino dahil sa pagkakapasa ng Sin Tax Law na makatutulong sa pagkontrol ng paninigarilyo sa bansa. (Bryan De Paz / Ruth Navales, UNTV News)

Credits: Wikipedia and Google Map

MANILA, Philippines — Patuloy na tumataas ang bilang ng mga kabataang maagang nabubuntis sa bansa.

Batay sa 2011 report ng United Nations (UN) Population Fund-Philippines, tumaas ng 70 porsyento ang antas ng teenage pregnancy sa bansa sa loob lamang ng 10 taon.

Noong 1999, umabot sa 114,205 ang naitalang kaso ng teenage pregnancy sa bansa, subalit pagsapit ng 2009 ay umakyat pa ito sa 195,662 kaso.

“Adolescent pregnancy is not just a health issue, it is a development issue, it is deeply rooted on poverty, gender inequality, violence, child and force marriage,” pahayag ni Dr. Reena Dona ng United Nation Population Fund – Philippines.

Sa ulat naman ng Commission on Population noong taong 2010, nakapagtala ng 168 maternal death sa mga kabataang may edad 15 pataas.

“When they get pregnant di nila alam how to take care of themselves, nahihiya pumunta sa mga clinic. Sometimes they keep it na lang,” pahayag ni Eleonor Cura, Regional Director ng Commission on Population.

Kabilang sa mga panganib na maaaring idulot ng maagang pagbubuntis ay ang pagkakaroon ng kumplikasyon na madalas nauuwi sa kamatayan.

Kaugnay nito, nananawagan ang ilang grupo sa pamahalaan na bigyan ng atensyon ang dumaraming kaso ng teenage pregnancy sa pamamagitan ng pagpapasa ng batas na makatutulong sa maayos na komunikasyon at samahan ng isang pamilya.

“Yung values education, yun yung foremost role ng family they have to give them real value,” pahayag pa ni Cura. (Grace Casin / Ruth Navales, UNTV News)

FILE PHOTO: Bagama’t may mga nakatalagang mga smoking area sa iba’t-ibang bahagi ng Davao City ay sa madalas na pagkakataon umano ay bakante ang mga ganitong lugar na isang patunay nga marahil na ang Davao City ay maaaring tawaging smoke-free city. (RITCHIE TONGO / Photoville International)

DAVAO, Philippines — Kinilala ng Southeast East Asia Tobacco Control Alliance o SEATCA ang mahigpit na pagpapatupad ng smoking ban sa lungsod sa loob ng mahigit sampung taon.

Kasabay ng isinasagawang regional workshop sa SMX Convention Center na naglalayung higit pang maging epektibo ang pagpapatupad ng smoking ban sa iba pang bansa na miyembro ng Association of Southeast Asian Nations, kinilala ng SEATCA ang Davao City bilang kaunaunahang 100 percent smoke free metropolitan sa ASEAN.

Mahigit 60 mga delegado mula sa mga bansang miyembro ng ASEAN ang nakikiisa sa tatlong araw na pagtitipon na nagsimula nitong Lunes.

Dito nagpahayag sila ng paghanga sa epektibong pagpapatupad ng smoking ban sa lahat ng lugar sa Davao City.

Ayon sa pamunuan ng SEATCA, malaking hamon ito para sa iba pang bansa na magpatupad din ng ganitong batas upang higit pang mapangalagaan ang kalusugan ng kanilang mga mamamayan.

Mula nang ipatupad ang mas mahigpit na anti-smoking ordinance noong Hunyo ay umabot na sa mahigit 900 ang nahuling lumalabag sa batas at binigyan ng mga citation tickets ng mga awtoridad.

Samantala, makikipag-ugnayan din ang mga naturang delegado sa anti-smoking taskforce ng lungsod upang makakuha ng ideya sa pagpapatupad ng ban.

Mahigpit naman ang ipinatutupad na seguridad sa mall na pinagsasagawaan ng workshop upang tiyaking ligtas ang lahat ng foreign at local delegates.  (LOUELL REQUILMAN, UNTV News )

FILE PHOTO: A man smokes next to a ”No Smoking” sign in downtown Shanghai April 27, 2011. Credit: Reuters/Carlos Barria

MANILA, Philippines – Anim na milyon ang namamatay bawat taon dahil sa paninigarilyo ayon sa ulat ng World Health Organization (WHO).

Ito’y sa kabila ng pandaigdigang kampanya tungkol sa masamang dulot ng naturang bisyo.

Pinangangambahan ng WHO na maaaring umabot pa sa walong milyon katao ang mamamatay kada taon pagdating ng 2030.

Sa survey ng Department of Health (DOH) noong 2009, umabot sa 240 na mga Pilipino ang namamatay kada araw dahil sa paninigarilyo.

Sinabi ni Health Justice of the Philippines Divina Trivino na sa kabila ng pag-iral ng batas sa tobacco control, hindi pa rin  ito sapat dahil na rin sa mga isinasaad na kundisyon pabor sa tobacco industry.

“Marami nang nagawa ang government pero kulang. There’s more we can do.”

“Yung problem is yung current laws right now it’s not effective. Marami sa ating mga government officials napapansin naming block by litigations yung efforts nila because of the confusing nature of some of the provisions of our current law yung RA 9211.”

Iminungkahi ni Trivino na ganap nang ipagbawal ang pag-advertise sa mga sigarilyo, at lawakan pa ang mga lugar na ipinagbabawal ang paninigarilyo.

“Kasi ngayon meron lang tayong partial ban.. What’s recommended by the WHO is a total ban. Tobacco Company should not be allowed to promote their products kasi it’s really harmful,” ani Trivino.

Muli namang isusulong ng mga anti-tobacco groups ang graphic health warning sa pagbubukas ng16th Congress sa pangunguna nina Senador Franklin Drilon at Senador Pia Cayetano na nauna nang naghain ng panukala ukol dito. (Ley Ann Lugod / Ruth Navales, UNTV News

FILE PHOTO: Sa loob ng isang tanggapan ng Philhealth. (UNTV News)

MANILA, Philippines — Simula ngayong buwan ng Agosto, maaari nang mag-avail ang ating mga mahihirap na kasangbahay ng libreng medical service.

Sa ilalim ng nilagdaang National Health Insurance Act, may Philhealth coverage na ang lahat ng mga Pilipino kabilang ang indigents at mga taong may kapansanan na walang kakayahang magbayad ng kontribusyon.

Maging ang mga kabilang sa listahan ng mga mahihirap na pamilya ng Department of Social Welfare and Development ay awtomatiko nang miyembro ng Philhealth sa ilalim ng National Health Insurance Program.

Ayon sa Department of Health, kapag naipatupad na ang health insurance act sa susunod na buwan, hindi na maaaring idahilan ng ating mga kababayan ang kahirapan upang hindi ipatingin ang kanilang karamdaman.

Maaaring magtungo sa mga Philhealth-accredited at pampublikong ospital para magpatingin ang ating mga mahihirap na kasangbahay; at kung sisingilin, ay maaari siyang maghain ng reklamo o humingi ng direct claim sa Philhealth. (UNTV News)

FILE PHOTO: Isa sa mga kilalang celebrity gumagamit ng hair chalks ang singer na si Nicki Minaj. Kamakailan ay nagbabala ang FDA sa pagbili at paggamit ng mga washable hair chalks na ibinebenta sa internet. (REUTERS)

MANILA, Philippines – Nagbabala ngayon ang Food and Drug Administration (FDA) laban sa pagbili at paggamit ng mga washable hair chalks na ibinebenta sa internet.

Sa opisyal na pahayag ng ahensya, wala pa silang natatanggap na dokumento mula sa anumang cosmetic establishment na nagbebenta ng washable hair chalks na aprubado ng ASEAN Cosmetic Directive for Washable Hair Chalks.

Dahil dito, posible anilang may sangkap tulad ng pampakulay, kemikal at preservatives ang mga washable hair chalks na maaaring magdulot ng hindi magandang epekto sa anit, ulo, mata at balat ng tao.

Nauuso ang washable hair chalks sa mga teenager na nagpapahid ng mga colored pastel chalk sa kanilang buhok para magkaroon ng iba’t ibang kulay.

Kaugnay nito, pinapayuhan ang publiko na gumamit lamang ng mga produktong aprubado ng FDA na maaaring makita sa consumers’ corner ng kanilang website na www.fda.gov.ph. (UNTV News)

Diseases and conditions where stem cell treatment is promising or emerging. (MIKAEL HÄGGSTRÖM via Wikipedia)

MANILA, Philippines – Inihain na sa mababang kapulungan ng Kongreso ang panukalang batas na naglalayong i-regulate ang stem cell therapy sa bansa.

Batay sa House Bill No. 732, bubuo ang pamahalaan ng dalawang ahensya na gagawa ng panuntunan sa pagsasagawa ng stem cell therapy at magmo-monitor sa mga ipinatutupad na batas ukol dito.

Ang panukala ay kasunod na rin ng mga lumabas na ulat hinggil sa dumaraming bilang ng mga sumasailalim sa nasabing medical procedure na posibleng samantalahin ng mga sindikato.

Ayon kay Ako Bikol Partylist Representative Rodel Batocabe, may ilang ulat na lumabas patungkol sa mga umano’y unauthorized practice ng stem cell therapy.

Isinasagawa pa umano ito sa mga non health facilities gaya ng mga hotel.

Kapag naisabatas, papatawan ng parusang isa hanggang walong taong pagkakakulong at multang nagkakahalaga ng P50,000 hanggang P100,000 ang lahat ng mapatutunayang lumabag dito. (Grace Casin / Ruth Navales, UNTV News)

FILE PHOTO: Cast member Cory Monteith poses at the Paley Center for Media’s PlayFest 2011 event honoring the television series “Glee” at the Saban theatre in Los Angeles March 16, 2011. (REUTERS)

ESTADOS UNIDOS – Inilabas na ng British Columbia Coroner’s Office ng Canada ang sanhi ng pagkamatay ng 31–year old Glee lead actor na si Cory Monteith.

Sa post-mortem test na isinagawa, lumabas na overdose sa heroin at alcohol ang dahilan ng kamatayan ni Monteith.

“Good afternoon. We’re here today to announce that we do now have a cause of death in the tragic death of Cory Monteith and that cause of death was mixed drug toxicity and it involved heroin primarily and also alcohol. For background, Mr. Monteith, who was 31 years old, was found deceased on Saturday, the 13th of July in his hotel room in downtown Vancouver, where he’d been staying for about a week,” pahayag ni Coroner Barbara Mclintock.

Napag-alaman na kagagaling lamang ng aktor sa rehabilitation nitong Marso dahil sa substance addiction.

Samantala, humingi naman ng privacy ang pamilya at kaibigan ni Monteith habang nagluluksa sa pagpanaw ng kanilang mahal sa buhay. (UNTV News)

CREDITS: REUTERS, Made In China Website and FDA (UNTV News)

MANILA, Philippines – Ilang whitening cream product ang bawal ipagbili o gamitin sa bansa.

Batay sa inilabas na abiso ng Food and Drug Administration (FDA), 16 na produktong pampaputi at cosmetic products mula sa China ang ipinagbabawal sa Pilipinas.

Bukod sa hindi rehistrado sa FDA, may sangkap pa umano ito na mapanganib sa balat gaya ng lead at mercury.

Pinapayuhan ng FDA ang publiko na maging mabusisi sa pagpili ng mga bibilhing produkto lalo na kung hindi maintindihan o nasa wikang banyaga ang nakasulat sa label nito.

Sa ngayon, ipinag-utos na ng FDA ang pagkumpiska sa mga ipinagbabawal na produkto sa mga pamilihan. Ang mga sumusunod na produkto ay ang mga ipinagbabawal:

1. Baiyansu Three-in-One Whitening Set;
2. Beauty Girl Green Cucumber 6 Days Double Whitening Soft Essence Cream;
3. Bihuayn Whitening Day Cream;
4. Care Skin Strong Whitening and Spot Removing Package;
5. Gakadi Freckle Removing Cream;
6. Huayuenong 12 Days Whitening and Speckle Removing Wrecking Set;
7. White Advance Hydroxytyrosol L-Glutathione Whitening and AntiAging Cream;
8. Yudantang Ginseng and Green Cucumber 10 Days Whitening Speckles Removed Essence
9. Yudantang Green Olive and Papaya Natural Essence 6 Days Specific Eliminating Freckle Whitening Sun Block Cream;
10. Yudantang Sea Pearl and Papaya 6 Days Specific Eliminating Freckle Whitening Cream;
11. Huayuenong 12 Days Whitening and Speckle Removing Wrecking Set;
12. Specific Eliminating Freckle Spot and Double Whitening Sun Block Cream;
13. Yudantang 10 Days Whitening Speckles Removed Essence (with picture of cow and papaya);
14. Zyiang Day Cream;
15. Whitening Cream (with the rest of the label in Chinese characters);
16. A product labelled in Chinese, gold package with picture of red flower with 3 green leaves

SOURCE: Food and Drug Administration

(UNTV News)

Children play in a fountain in Shanghai, China, as temperatures soar during a heatwave (REUTERS/Carlos Barria)

SHANGHAI, China – Patuloy na tumataas ang bilang ng mga biktima ng heat stroke sa bansang China dahil sa sobrang init ng panahon na namamayani sa bansa.

Dahil dito, nagbabala sa publiko ang mga dalubhasa sa Shanghai na mag-ingat tuwing lumalabas ng kanilang bahay.

Sa tala ng Health Ministry ng China, tinatayang nasa 11 na ang nasawi sa Shanghai dahil sa heat stroke at karamihan sa mga ito ay matatanda.

Ayon sa local meteorological department doon, naitala ang pinakamainit na temperatura noong buwan ng Hulyo na umabot sa 40°C. Pinakamainit umano ito sa nakalipas na sampung taon.

“Ngayon umaabot ng 40, 37 degrees, ang pinakamapanganib ngayon ay ang tinatawag nating heat stroke or tinatawag na heat injuries o overheat ng kaatwan,” pahayag ni Dr. Michael Ong, Suntec, Shanghai, China.

Dahil sa mainit na panahon, dagsa ngayon ang maraming tao sa beaches at swimming pools.

Payo naman ng ilang eksperto, iwasan muna ang outdoor activities upang hindi ma-heat stroke at kung hindi maiiwasan ay huwag kalimutang magdala ng inuming tubig.

“The best way to prevent is to avoid extreme weather, kapag lumagpas na sa body temperature (36-37 degrees) mas maganda i-cancel nalang ninyo ang mga outdoor activities ninyo. Kung kailangan talaga ay magdala kayo ng water or sports drink para hindi kayo matuyo,” ani Dr. Ong. (Dulce Alarcon / Ruth Navales, UNTV News)

FILE PHOTO: Isang pasyenteng inoobserbahan sa Saint Elezabeth Hospital ng General Santos City dahil sa posibilidad ng pagkakaroon niton ng dengue. Ang larawang ito ay kuha noong Hulyo 01, 2013. (DARWIN DEE / Photoville International)

GENERAL SANTOS CITY, Philippines – Nagdeklara na ng outbreak sa limang barangay sa General Santos City dahil sa mataas na bilang ng kaso ng dengue.

Kabilang dito ang Barangay Fatima, Lagao, San Isidro, Labangal, North Poblacion at Barangay Calumpang.

Kumpara noong nakaraang taon, malaki ang itinaas ng kaso ng dengue sa lungsod kumpara ngayong taon.

Ayon kay Dr. Edgardo R. Sandig, City Health Officer ng lungsod, mula 1,600 kaso noong 2012, umabot na ito ngayon sa 1,700 sa unang quarter pa lamang ng taon, kung saan labing-siyam dito ang namatay.

Tiniyak naman ng lokal na pamahalaan ng General Santos City na gumagawa na sila ng mga hakbang upang makontrol ang paglaganap ng nakamamatay na sakit.

Pinapayuhan ang mga mamamayan na ugaliing maglinis ng kapaligiran araw-araw.

Samantala, isang clean up drive naman ang isasagawa sa Barangay Fatima sa August 30 sa pangunguna ng City Health Office bilang kampanya kontra dengue. (Queenie Matuan / Ruth Navales, UNTV News)

A man smokes next to a “No Smoking” sign in Shanghai. China is the largest consumer of tobacco. Photo: Reuters

SHANGHAI, China – Sinimulan nang ipatupad ang Anti-Smoking Law sa China alinsunod sa kampanya ng World Health Organization Framework Convention on Tobacco Control.

Ngunit ayon kay dating Health Minister Huang Jiefu, walang ngipin ang naturang batas dahil mismong ang mga tagapagpatupad nito ang lumalabag.

Ang mga naging prime minister ng bansa na sina Mao Zedong at Deng Xiaoping ay kilalang mga heavy smoker.

Samantalang ang kasalukuyang premier na Si Xie Jinping ay naging kontrobersiyal pa sa kaniyang research na naglalaman ng pamamaraan kung paano umano mababawasan ang masamang epekto ng tar kapag naninigarilyo.

Nangunguna ang bansang China sa talaan ng pinakamaraming active smokers sa mundo.

Ayon sa survey, umaabot sa 300 million Chinese ang naninigarilyo at karamihan sa mga ito ay mga lalake.

Ang mga kababayan nating Pilipino, dismayado rin sa dagdag na polusyon at walang disiplinang paninigarilyo sa China.

Ayon sa OFW na si Nick Awat, halos walang epekto ang bagong batas kaugnay sa paninigarilyo.

“Yong bagong batas ng paninigarilyo, ganun parin naman sila sigarilyo pa rin kahit saan, restaurant, elevator. tingin ko nga mas dumadami pa ang naninigarilyo kung saan saan lng sila nagsisigarilyo.”

Ayon naman kay Armando Gandela, “hangga’t maaari ay ipagbawal at ipatupad ang batas na kailangan madisiplina ang mga naninigarilyo.”

Samantala sa Shenzhen, China ay hinigpitan pa ang pagpapatupad Anti-Smoking Law.

Mula sa 20 RMB ay tumaas sa 500 RMB o P3,500 ang multa sa mahuhuling naninigarilyo sa mga lugar na ipinagbabawal.

Habang 30,000 RMB o P210,000 naman ang babayaran ng anumang kumpanya na nagtitinda o nagpapahintulot ng paninigarilyo sa mga non-smoking areas. (Dulce Alarcon / Ruth Navales, UNTV News)

Ayon sa Philippine National AIDS Council sa kasalukuyan ay nasa 14,000 na ang naitatalang kaso ng HIV sa buong bansa. (UNTV News)

MANILA, Philippines — Naaalarma na ang Philippine National AIDS Council (PNAC) sa tumataas na bilang ng mga nagkakasakit ng HIV (Human Immunodeficiency Virus) sa bansa.

Karamihan sa mga naitatalang kaso ay dahil sa pakikipagtalik sa kapwa lalaki o male having sex with male at ang paggamit ng injectable drugs.

Ayon kay PNAC Executive Director, Dr. Ferchito Avelino, umabot na sa 5-percent ang prevalence rate o ang pagkalat nito.

“Currently the Philippine HIV epidemic is not the usual that is low and slow prevalence. We are now experiencing a fast and furious type of epidemic where in the epidemic is concentrated on male who having sex with male and people who are injecting drugs.”

Sa kasalukuyan ay nasa 14,000 na ang naitatalang kaso ng HIV sa buong bansa.

Bagama’t hindi pa ito maituturing na epidemya sa kabuoang populasyon ng bansa, nakakaalarma naman ang mabilis na pagdami ng kaso ng HIV sa mga nakalipas na taon.

“Epidemic ba ito sa general population, ang sagot natin ay hindi pa as of this moment pero we are looking at certain portion of population who is now experiencing an increasing HIV cases amongst them. at lahat ng generalize epidemic ay nagsisimula sa concentrated epidemic,” ani Dr. Avelino.

Batay sa pagaaral, mula noong 2010 isa kada isang oras at dalawampu’t limang minuto ang naitatalang kaso ng HIV.

Sinabi ni Dr. Avelilno na gugugol ng P1.2-billion upang mapigilan ang paglaganap ng nakamamatay na sakit.

Ilalaan ang pondo sa edukasyon ukol sa sakit, pagkakaroon ng mga kagamitan upang maiwasan ang pagkakahawa at pagpapagamot sa mga may HIV.

Iminungkahi rin ni UN Asia Pacific Ambassador for AIDS na si JVR Prasada Rao, na dapat magkaroon ng sapat na edukasyon ang kabataan ukol sa HIV at AIDS.

“We need to see that education program is intensified across the country especially with emphasis of young population because they are the ones most at risk.”

Sinabi naman ni Rep. Eriguel Eufranio, chairman ng House Committee on Health na pag-aaralan pa nila ang panukala sa budget deliberation ng Department of Health.

“Sec. Ona is on top of the situation he has briefed me on this problem lately I’m pretty sure we will discuss this on the budget deliberation of the DOH,” anang mambabatas. (Ley Ann Lugod / Ruth Navales, UNTV News)

Google Maps: Eastern Visayas

TACLOBAN CITY, Philippines — Tumaas ng tatlong daang porsiyento ang kaso ng dengue sa Eastern Visayas.

Base sa datos ng Department of Health (DOH) Region 8, mula Enero hanggang Agosto ngayong taon, umabot na sa halos dalawang libo at limang daan ang kaso ng dengue sa rehiyon.

Ayon kay Leonido Olobia, pinuno ng Vector-Borne Disease Control Program, pinakamaraming naitalang kaso sa Tacloban City na may 713 kaso, sinundan ito ng Guiuan, Eastern Samar na may 120 cases.

“There is already a transovarial transmission in the Philippines, in Cebu particularly mayron pong study ginawa na yung mga larva mayron na silang viruses ng dengue, ibig sabihin ‘pag naging lamok sila isang kagat lang nila mayron na silang pwedeng matransmit.”

Sa pagdami ng mga dengue carrying mosquito sa rehiyon, hindi umano nararapat na dumepende ang publiko sa mga health workers at barangay official sa paglilinis ng kapaligiran.

Mas malaki aniya ang maitutulong kung sa bawat tahanan ay magkaroon ng responsibilidad ang bawat mamamayan na palagiang maglinis ng kapaligiran.

“Kasi ang dengue wala siyang gamot , there is no cure, kaya it relies to the behavioral change. Dengue control is a way of life ng mga tao, dapat titingnan mo ang surroundings mo araw-araw, ganun siya ka-challenging,” dagdag pa ni Olobia. (Jenelyn Gaquit / Ruth Navales, UNTV News)