Nakatakdang magsagawa ng mobile COVID-19 vaccination drive sa susunod na linggo ang Department of Transportation (DOTr), katuwang ang Metropolitan Manila Development Authority (MMDA).
Sa isang pahayag, sinabi ng DOTr na idaraos ang limang araw na aktibidad sa Parañaque Integrated Terminal Exchange (PITX) mula Enero 24 hanggang 28.
Ang vaccination drive na tinaguriang “We Vax as One: Mobile Vaccination Drive,” ay para sa mga pasahero at transport workers ng PITX nan ais magpaturok ng COVID-19 vaccine at boosters.
Ayon sa DOTr, AstraZeneca vaccine brand ang ibibigay bilang first, second, o booster doses. Bibigyan din ng prayoridad ang mga tatanggap ng booster shots.
Nasa 500 bakuna ang target na maibigay rito kada araw.
Nagbigay ang Parañaque City government ng first batch ng mga bakuna para sa vaccination drive, habang ang natitirang kailangang dose ay nanggaling sa national government sa ilalim ng nationwide vaccination program.
“Mahalaga po para sa atin na masigurong bakunado ang ating mga bayaning transport workers, lalo na at iba’t-ibang lugar ang kanilang pinupuntahan, gayundin ang ibang stakeholders at mga commuters na kanilang nakakasalamuha sa araw-araw,” ang pahayag ni Transportation Secretary Arthur Tugade.
Ayon sa DOTr, isasagawa ang limang araw na bakunahan sa PITX mula alas 8:00 ng umaga hanggang alas 12:00 ng tanghali.
Pinapayuhan ang mga nais magpabakuna na magtungo sa Gate 4 sa PITX 2nd floor.
Tatanggap ng walk-in vaccinees sa vaccination drive pero may gagawin ring registration sa lugar.
Kung matatandaan, isang katulad na COVID-19 vaccination drive rin ang isinagawa ng DOTr noong nakaraang taon para sa transport workers sa PITX.
The post DOTr, MMDA magsasagawa ng 5-araw na mobile vaccination drive sa PITX para sa commuters, PUV workers appeared first on UNTV News.